'S e sreath ùr a' comharrachadh gu bheil 70 bliadhna bho chaidh Sgoil Eòlais na h-Alba a stèidheachadh aig Oilthigh Dhùn Èideann a th' ann a Sgaoileadh an Eòlais. Tha sinn air iarraidh air grunn dhaoine taghadh a dhèanamh air clàraidhean a tha prìseil dhaibhsan à tasglann na Sgoile ge b' e daoine a bhuineadh dhaibh, sgìre air a bheil iad eòlach neo cuspair anns a bheil ùidh aca. Agus abair gun d'fhuair sinn taghadh de dhualchas agus beul-aithris na Gàidhlig!

'S e aoigheachd an cuspair a tha fa-near dhan t-seinneadair agus an òraidiche Maighread Stiùbhart a seo. Mar a tha i ag ràdh, 'Eu-coltach ris an là ‘n-diugh, anns na seann làithean bha aoigheachd ga tabhann an asgaidh, agus gu dearbha cha b' e sin an aoigheachd shuarach, ach na h-annlan agus am frithealadh a b’fheàrr.'

Gheibh sinn iomradh bhuaipe air an aoigheachd a bhiodh an Cliar Sheanchain a' faighinn; na bhiodh a' dol sna taighean mòra aig na h-uaislean; na bhiodh balaich a' faighinn Oidhche Challain; na bha de bhiadh 's de dheoch a' dol aig Banais Ghleann Bhargaill; an aoigheachd a b' urrainn dhut fhaighinn air an àirigh agus na dh'fhaodadh tachairt nuair a dheigheadh brath a ghabhail air aoigheachd. Show less