Sgeulachd Beatha

Original version

BBC Radio nan Gàidheal

Documentaries

Factual: Life Stories

Còmhraidhean le daoine mum beatha gu ruige seo. Conversations on life stories

Sgeulachd Beatha: An t-Urr Iain Mac a' Ghobhainn

An t-Urr Iain Mac a' Ghobhainn

BBC Radio nan Gàidheal - Sgeulachd Beatha, An t-Urr Iain Mac a' Ghobhainn

1/2 An t-Urr Iain M Mac a' Ghobhainn. Turas-beatha à clachan Shiadair gu Clachan Uibhist

An t-Urr Iain M Mac a' Ghobhainn nach maireann, à clachan Shiadair gu Clachan Uibhist. The late Rev John M Smith speaks of his journey from Shader, Lewis to Clachan in Uist.

Ged a rugadh an t-Urramach Iain M Mac a' Ghobhainn, John Murdo an Tucsain, ann an Leòdhas anns an Lùnastal 1927, chanadh e fhèin nach mòr nach e Uibhisteach a bh' ann. Dh'fhalbh e à Leòdhas aig aois 18, nuair a chaidh e do Fheachd an Adhair, agus bha e an Uibhist còrr math air leth-cheud bliadhna.
B' e an treas mac aig Alasdair Iain Sheònaid à Siadar agus bhuineadh a mhàthair, Oighrig Iain Uilleim Ruaidh, do sgìre Bharabhais. Bha còignear theaghlach aca - Dòmhnall Iain, Uilleam, John Murdo, Catrìona agus Dòmhnall Murdo. Clann an Tucsain a chanar riutha, an t-ainm a' tighinn bhon athair a chuir seachad ùine an Ameireagaidh na òige.
Chaidh Iain do Sgoil Àirigh an Tuim agus às dèidh an sgoil fhàgail aig aois 14, bha e a' dèanamh obair sam bith a bha dol, a' cuideachadh le obair fearainn agus le togail thaighean. Aig aois 18 chaidh a thogail do Fheachd an Adhair. An dèidh greis a' trèanadh ann an Sasainn am meadhan nan dà fhicheadan, chaidh e dhan Èiphit agus às dèidh sin a dh'Iraq.

Thill John Murdo à Feachd an Adhair air ais a Shiadar ann an 1948 agus bliadhna an dèidh sin thàinig atharrachadh na bheatha nuair a bha dùsgadh spioradail as a' sgìre ri linn an t-soisgeulaiche an t-Urr Donnchadh Caimbeul. Chuir John Murdo aghaidh air foghlam agus ullachadh airson a bhith na mhinisteir. An 1956, cho luath 's a bha e ullamh, fhuair e gairm a dh'Uibhist a Deas, bho choitheanal Eaglais Tobha Mòr. Bha trì eaglaisean rim frithealadh as a' sgìre - ann an Tobha Mòr, san Druim Mòr agus san Ìochdar. 'S ann an eaglais an Ìochdair a choinnich e ri bhean, Mairead Nic a' Phearsain, a bha na tidsear bun-sgoil agus, dà bhliadhna an dèidh dha dhol a dh'Uibhist, phòs iad.

Bha an t-Urr Mac a' Ghobhainn air a bhith ann an Tobha Mòr seachd no ochd a bhliadhnaichean nuair a fhuair e gairm bho choitheanal Loch nam Madadh is Thruimisgearraidh. Ghluais e gu tuath ann an 1963. Shaothraich e an Uibhist a Tuath airson deich bliadhna fichead, a' frithealadh trì eaglaisean an Truimisgearraidh, Loch Portain agus Loch nam Madadh. Tha e air a dhreuchd a leigeil dheth ach tha e fhathast a' fuireach a Loch nam Madadh. Tro na bliadhnaichean a bha e ag obair an Uibhist a Tuath, bha e a' smaoineachadh gun d' rinn e mu shia mìle searmoin, gun do bhaist e còrr air dà cheud pàiste agus gun do phòs e ceithir fichead càraid 's a deich.

Chaidh Bonn Ìmpireachd Bhreatainn, am BEM, a bhuileachadh air an Urr Iain M Mac a' Ghobhainn ann an Liosta Urraman na Banrigh ann an 2016 agus b' e sin a' bhliadhna cuideachd a chomharraich e tri fichead bliadhna bho ghabh e dreuchd ministeir.

Bhàsaich Mgr Mac a' Ghobhainn air an treas là deug den Dùbhlachd 2022 aig aois ceithir fichead 's a còig deug.

Èist ri naidheachdan, còmhradh, ceòl agus spòrs gach là, moch gu anmoch.

Accessibility links

Programme Index

Sgeulachd Beatha

An t-Urr Iain Mac a' Ghobhainn

Genres

Brand

BBC Radio nan Gàidheal

About BBC Radio nan Gàidheal