Original version

BBC Radio nan Gàidheal

Dèanamaid Adhradh

Religion & Ethics

Adhradh is seirbhisean-eaglaise. Acts of worship and church services

Adhradh is seirbhisean-eaglaise. Acts of worship and church services.

Deanamaid Adhradh

Dèanamaid Adhradh: Harvest Thanksgiving Service from 1986

17/11/2013

Harvest Thanksgiving Service from 1986

BBC Radio nan Gàidheal - Dèanamaid Adhradh, Harvest Thanksgiving Service from 1986

Seirbheis Taingealachd an Fhoghair bho 1986 bho Eaglais Shaor Phort Rìgh.

Seirbheis Taingealachd an Fhoghair còmhla ris an Urr Uilleam Caimbeul agus an Urr Iain Fearghasdan. Gaelic Harvest Thanksgiving Service with Rev W Campbell and Rev John Ferguson.

Anns an t-seirbheis seo cluinnidh sibh na sailm agus na leughaidhean a leanas:

Salm 147: 12-16 air fonn St David agus salm 67:4-6 air fonn Torwood, os cionn na seinn bha Alasdair MacLeòid
Salm 145:15-16 air fonn Free Church agus Salm 24:1-3 air fonn Evan, os cionn na seinn bha Alasdair Guinne 
Leughaidhean :
Salm 104: 27-35 agus 2 Corintianaich 9: 6-15
Ceann-teagaisg: Salm 104:27 agus 2 Corintianaich 9: 10-12

An t-Urr Uilleam Iain Caimbeul 1933- 2007
Rugadh Uilleam Caimbeul, mac ministeir, ann an 1933. Bha athar, air an robh Uilleam cuideachd, na mhinistear ann an Eaglais Shaor a' Chnuic anns an Rudha, Leòdhas. Chaidh e a Bhun-Sgoil Phabail agus Àrd-Sgoil MhicNeacail agus às dèidh sin ghluais e a Ghlaschu far an do chuir e seachad ùine ann an Colaiste Teicneòlais Ghlaschu. Fhuair e obair an uairsin aig companaidh àrachais. Ann an 1954 chaidh e dhan arm, mar a chaidh mòran eile, agus bha e stèidhichte ann am Bermuda fad na h-ùine.
Dh'atharraich beatha Uilleam Iain gu mòr ann an 1956 nuair a chaidh iompachadh às dèidh dha a dhol a dh'èisteachd ris na searmonan soisgeulach aig an Urr Calum Moireasdan ann an Eaglais Shaor Phartaic ann an Glaschu. Bha cothrom obrach air leth aige mar 'actuary' ach leig e sin roimhe agus chaidh a e dh' Oilthigh Obar Dheathain airson e fhèin ullachadh airson dreuchd ministear a leantainn. Phòs e Mairead Mhoireasdan à Steòrnabhagh ann an 1964 agus tha triùir do theaghlach aca.
Thug Uilleam Iain a-mach dreuchd ministear ann an 1968 agus chaidh e a-null gu Detroit airson beagan ùine. Fhuair e gairm gu Eaglais Shaor na Pàirce an ceann a deas na Loch an Leòdhas ann an 1972 agus bha e a' frithealadh na paraiste sin gu 1983 nuair a ghluais e gu Eaglais Shaor Phort Rìgh. Nuair a leig e dheth a dhreuchd chaidh e fhèin agus a bhean a dh'fhuireach a dh'Inbhirnis. Bhàsaich Mgr Caimbeul ann an 2007.



An t-Ollamh Urramach Iain Fearghasdan 1937 - 2009
Rugadh Iain Fearghasdan ann an Cnoc an Torrain , Uibhist a Tuath anns a' Mhàirt 1937. An dèidh dha an sgoil fhàgail bha e ag obair ann an Uibhist agus air tìr-mòr, a' falbh bho obair gu obair, oir aig an àm sin, cha robh miann sam bith aige dreuchd sònraichte a leantainn.
Thàinig e fo bhuaidh an t-soisgeil nuair a bha dùsgadh spioradail ann an Uibhist ann an 1958 agus b'ann sa bhliadhna às dèidh sin a chaidh e gu Colaiste Faith Mission an Dùn Èideann airson trì bliadhna. Às dèidh grunn bhliadhnaichean a chuir seachad mar shoisgeulaiche ann an Alba agus ann an Èirinn dh'fhairich e gun robh's ga ghairm gu bhith na mhinistear ann an Eaglais na h-Alba. Rinn e ullachadh ann an Colaiste Skerry agus chaidh e às an sin gu Oilthigh Ghlaschu far an d'fhuair e LTh. Thug e mach BD anns na bliadhnaichean às dèidh sin agus fhuair e urram o Cholaiste Chrìosdail Chanada nuair a rinn iad Dotair Diadhaireachd dheth ann an 1996.
Anns an Ògmhios 1973 fhuair Iain cead-searmonachaidh o Chlèir Ghlaschu agus anns an Dàmhair sin ghabh e gairm bho choitheanal Chrois ann a Nis a Leòdhas far an robh e a' searmonachadh airson seachd bliadhna. Ann an 1980 ghluais e fhèin agus an teaghlach gu Port Rìgh agus bha e an sin gus an do leig e dheth uallach coitheanail ann an 2002. Bha Iain pòst' aig Oighrig agus bha triùir de theaghlach aca - Iain, Gilleasbaig agus Agnes - agus an-diugh tha triùir oghaichean aca, Acacia, Elijah agus Anndra. Bha Oighrig na cùl-taic do dh'Iain fad na bliadhnaichean a bha e na mhinistear. Às dèidh a dhreuchd a leigeil dheth chaidh iad a dh'fhuireach dhan Mhanachainn. Bhàsaich Iain air an t-siathamh là den Fhaoilleach 2009 agus tha e air a thiodhlacadh ann an Cladh Chille Mhoire ann an Uibhist a Tuath.

Èist ri naidheachdan, còmhradh, ceòl agus spòrs gach là, moch gu anmoch.

Accessibility links

Programme Index

Dèanamaid Adhradh

Harvest Thanksgiving Service from 1986

Genres

Brand

BBC Radio nan Gàidheal

About BBC Radio nan Gàidheal