Rugadh Uilleam Ros anns an t-Srath san Eilean Sgitheanach ann an 1762, faisg air an t-Sìthein. A' leantainn rathad Ealaghol a-mach às an Ath Leathann, tha làrach taigh mòr Choire Chatachain air an làimh dheis, agus bha an Sìthean faisg air a sin. Bha a mhàthair à sgìre Gheàrrloch agus 's ann bho a taobh-se a fhuair Uilleam a' bhàrdachd agus an ceòl. B' e Iain MacAoidh, Am Pìobaire Dall, a bha na bhàrd agus na phìobaire aig Sir Eachainn MacCoinnich Gheàrrloch, a sheanair.

B' ann às an Eilean Sgitheanach a bha athair, ceannaiche-siubhail air an robh Iain Ros. Bhiodh Uilleam òg tric a' falbh còmhla ri athair agus, mar sin, fhuair e eòlas air na h-eileanan agus àiteachan eile air feadh na dùthcha. Fhuair e cuideachd eòlas air dualchainntean eadar-dhealaichte. Ged a rinn Uilleam Ros, mar eisimpleir, dàin molaidh, bàrdachd nàdair agus òrain èibhinn, chan eil teagamh nach ann airson òrain gaoil a tha e gu h-àraidh aithnichte.

A rèir beul-aithris, thuit e ann an trom ghaol le Mòr Ros, a bhuineadh do Steòrnabhagh, turas is e as a' bhaile. Gu mi-shealbhach phòs Mòr sgiobair à Liverpool, Caiptean Clough, ann an 1782, agus dh'fhalbh iad a Shasainn. Bha Mòr air pòsadh nuair a rinn e Feasgar Luain agus e a' cuimhneachadh air an fheasgar Luain ud a bha e na cuideachd.

Sa phrògram cluinnidh sibh Donaidh Murdo Macleòid, Iain Dòmhnallach, Joina NicDhòmhnaill, Eachann MacChoinnich agus Coinneach MacThòmais a' beachdachadh air an òran. Tha a' bhàrdachd air a leughadh le Sìm MacChoinnich.

Cluinnidh sibh criomagan den òran aig Donaidh Murdo Macleòid, An t-Urr Uilleam MacMhathain agus aig Ceòlraidh Ghàidhlig Ghlaschu. Show less