Freumhan: pròiseact far an robh luchd-obrach aig Aonad Ioma-mheadhan Chomhairle nan Eilean Siar a' leantainn ceathrar eileanach òga agus iad a' rannsachadh eachdraidh an teaghlaichean fhèin agus na ceanglaichean a bh’ aig na teaghlaichean aca ri cuid de na prìomh thachartasan a ghabh àite anns na h-Eileanan an Iar thar na ceud bliadhna a chaidh seachad.

Eilthireachd, buaidh a' chogaidh, strì an fhearainn agus tubaist na h-Iolaire, sin na cuspairean air an robh an òigridh a' beachdachadh. Tha Aonad Ioma-mheadhan Chomhairle nan Eilean Siar am beachd prògram aithriseach a chur ri chèile mar ghoireas foghlaim agus a bhios ri fhaighinn air an eadar-lin an ath bhliadhn'. Ach anns na prògraman rèidio seo, gheibh sinn blasad de na dh’ionnsaich an oigridh mun sinnsirean. Anns a' chiad phrògram tha sinn a’ coinneachadh ri Ceitidh à Barraigh agus Niall à Uibhist. Show less