Se Emmanuel Macron a' chiad Cheannard Stàit anns an Fhraing nach do chur seachad ùine anns na Feachdan Armaichte agus a-nis tha an dearbh dhuine air co dhùnadh gum bu chòir Seirbhis Nàiseanta tilleadh air ais airson a h-uile duine òg. Tha cuimhne aig Seonaid Boydell mar a chaidh cur às don t-Seirbhis Nàiseanta anns an Fhraing bho chionn fichead bliadhna.

Fhuair Coinneach iasad de thrì leabhraichean a tha dìreach ceud bliadhna a dh'aois - Am Faclair Dwelly, an dàrna foillseachadh, a' chiad fhear air a cheartachadh. Chan eil na còmhdaichean ann an deagh òrdugh ach air an duilleag toisich tha bileag a tha ag innse ann an Laidinn gur e duais a bha seo do dh'fhear Iain Macleòid bho Roinn Cheiltich Oilthigh Ghlaschu anns a' bhliadhna 1920. Tha an t-Ollamh Aonghas MacCoinnich ann an Glaschu agus Iain MacArtair bho Chomunn Eachdraidh Chàrlabhaigh ann an Leòdhas air a bhith a' cuideachadh Choinnich a' rannsachadh an eachdraidh, na daoine ceangailte ris an leabhar agus am foillsichear an t-Ollamh Calder.

Cuideachd sgeulachd an t-Ollamh Jeremy Bentham nach d'fhuair riamh an cothrom turas a dhèanamh gu na Stàitean Aonaichte. Ach a-nis 186 bliadhna an dèidh a bhàis tha a chorp a tha air a bhith air a thaisbeanadh ann an Lunnainn bho chaochail e, a' gluasad gu taigh-tasgaidh ann an New York. B' e feallsanaiche a bh' ann am Bentham agus tha Dòmhnall Macleòid còmhla rinn airson an sgeulachd iongantach seo innse.

Agus tha Aonghas Dòmhnallach air ais le taghadh eile de sgeulachdan à Courier Inbhir Nis a tha a' comharrachadh 200 cheud bliadhna. bbc.co.uk/coinneach. Show less