Anns an t-seirbheis cluinnidh sibh na sailm agus an leughadh a leanas:

Salm 40: 7-8 air fonn Evan agus Salm 126: 1-2 air fonn Morven. 'S e Alasdair MacLeòid a tha os cionn na seinn a chaidh a chlàradh ann an Eaglais Shaor Phort Rìgh.

Leughadh: Iosua 2: 1-30
Ceann-teagaisg: Iosua 2

Rugadh Coinneach anns an Eilean Sgiathanach ann an 1935. Às dèidh Seirbhis Nàiseanta a' dhèanamh chaidh e an uair sin a dh'obair gu Roinn nan Cusbainn agus thug an obair e gu ruige Steòrnabhagh. Fhad 's a bha e ann an Leòdhas bha e am measg na ciad chomhairlichean a chaidh a thaghadh airson Comhairle nan Eilean Siar ann an 1974 agus e a' riochdachadh Sgìre Chuil. Bha e cuideachd na chluicheadair ball-coise air leth. Dh'fhàg Mgr Dòmhnallach a dhreuchd aig Roinn nan Cusbainn gus slighe eile a ghabhail na bheatha agus chaidh e air ais dhan cholaiste airson trèanadh airson na ministrealachd.

Fhad 's a bha e na oileanach ann an Colaiste na h-Eaglaise Saoire ann an 1981 thàinig an naidheachd dhuilich gun robh an nighean aige, Alison, air chall ann an Kashmir 's gun i ach 19 agus i air thuras còmhla ri caraid anns na h-Innseachan. Chum Mgr Dòmhnallach air a' strì airson lorg fhaighinn air Alison còrr air 30 bliadhna agus e cinnteach gu robh i fhathast beò agus gu faiceadh e a-rithist i. Chaidh e fhèin 's a bhean, Reta, gu ruige na h-Innseachan còrr air fichead turas thar nam bliadhnaichean.

Às dèidh an trèanadh aige a dhèanamh ann an Colaiste na h-Eaglaise Saoire, chaidh Mgr Dòmhnallach a ghairm gu coitheanal Ros Cuithne ann an 1984, bha e an sin airson aona bliadhna deug. B' fheudar dha a dhreuchd mar mhinistear air coitheanal a leigeil dheth agus e a' fulang le MS ach, a' dh'aindheoin sin, bha e fhathast a' searmonachadh thall 's a bhos, ged a bha a fhradharc a' fàilligeadh.

Bhàsaich Mgr Dòmhnallach san Fhaoilleach 2018 aig aois 83 anns an ospadal ann an Drochaid a' Bhanna ann an Cataibh. Tha e a' fàgail a bhean Reta agus triùir de theaghlach a bharrachd air Alison. Show less