Tha Ailean Dòmhnallach air a bhith ag obair ann an craoladh Gàidhlig bho thòisich e anns a' BhBC anns na seachdadan. B' e a' chiad mhanaidsear a bh' aig BBC Radio nan Eilean ann an Steòrnabhagh agus bha e cuideachd os cionn a' BhBC air Ghàidhealtachd mas d' fhuair e dreuchd mar Riochdaire Telebhisean ann an Glaschu.
Chaidh e an uairsin gu Telebhisean Grampian ann an Obar Dheathain far an robh e na Cheannard Gàidhlig gus an do stèidhich e an companaidh telebhisean neo-eisimeileach aige fhèin, MNE TV.
Thar nam bliadhnaichean tha e air a bhith na àrd-riochdaire agus na stiùiriche air prògraman de gach gnè, a bharrachd air a bhith na Chathraiche air a' Chomann Malairt TV agus Film PACT ann an Alba agus na Stiùiriche air Bòrd PACT na Rìoghachd Aonaichte ann an Lunnainn. Tha e an-dràsta na Chathraiche air Bòrd na Gàidhlig.
Ann an Sealladh Eile na seachdain sa, tha liosta cheistean an-àbhaisteach aig Iain MacIlleMhìcheil do dh'Ailean. Gheibh sinn a-mach dè na buadhan as làidire a th' aige, dè rud a b' fheumail a dh' ionnsaich a phàrantan dha agus cluinnidh sinn sgeulachd a thaobh aon rud prìseil a cheannaich e air chuairt gu ruige Iosrael ris nach dealaich e. Show less