Air an 13mh là den Dàmhair, 1877, bhuail tuil air ceann a tuath an Eilein Sgitheanaich a rinn sgrios uabhasach. Bha an tuil cho dona 's gun dh'fhalbh i le loidse an uachdarain ann an Ùige agus bhàsaich fear den luchd-obrach a bha na broinn. Chaidh drochaidean a mhilleadh agus chaidh a' mhòr chuid de seann chladh Ùige a sguabadh a-mach gu muir, a' fàgail seallaidhean uabhasach de chuirp agus de chisteachan briste air feadh an àite. Ann an Stafainn, b' fheudar do mhuinntir an àite am ministear a thoirt a-mach tro uinneag a' mhansa air ròpa leis cho àrd 's a dh'èirich an t-uisge.

'S ann à Stafainn a tha am fear-naidheachd Seumas Dòmhnallach agus, thar an dà phrògram a tha seo, tha e airson tuilleadh ionnsachadh mun tuil mhòr bho chlàran oifigeil agus bho mhuinntir na sgìre fhèin. Show less