Tha Canada, mar a chuala sinn na bu tràithe air a' bhliadhna, a' comharrachadh 150 bliadhna bho chaidh Co-Chaidreachas Chanada a stèidheachadh 's mar a tha fios againn, 's iomadh Gàidheal a chaidh a-null thar na linntean, cuid dhan deòin agus cuid dhan aindeoin. Tha earrann den eachdraidh aca air a thasgadh againn a seo aig Radio nan Gàidheal.

Rinn Fred MacAmhlaigh sreath phrògraman ann a 1983 an dèidh dha clàraidhean a dhèanamh an Canada ann a 1982. Anns a' phrògram seo tha Fred a' toirt sùil air cuid den fheadhainn a dh'fhalbh à Uibhist a Deas agus Beinn a' Bhadhla sna 1880an agus a thog orra gu Saskatchewan. Tha e a' mìneachadh suidheachadh nan eilean aig an àm agus mar a dh'fhalbh a' chiad bhuidheann ann an 1883 air an SS Scandinavian, le fianais phearsanta bho leabhar-là Dhòmhnaill MhicDiarmaid bhon Àrd am Beinn a' Bhadhla a bha còmhla ris a' bhuidhinn sin, ach a bha cuideachd air a bhith thall roimhe a' coimhead ris an àite. Tha litrichean eile cuideachd a tha ag innse cho math agus a bha cùisean thall le talamh gu leòr agus sìol dha chur, ach bha cuid eile a bha ag innse mu cion fiodh airson connadh agus taighean a thogail. Show less