Tha Canada, mar a chuala sinn na bu tràithe air a' bhliadhna, a' comharrachadh ceud gu leth bliadhna bho chaidh Co-Chaidreachas Chanada a stèidheachadh 's mar a tha fios againn, 's iomadh Gàidheal a chaidh a-null thar na linntean, cuid dhan deòin agus cuid dhan aindeoin. Tha earrann den eachdraidh aca air a thasgadh againn a seo aig Radio nan Gàidheal agus thairis air na deich seachdainnean tha romhain cluinnidh sinn cuid dhiubh. An toiseach sreath phrògraman a rinn Fred MacAmhlaigh an dèidh dha sgrìob a thoirt a-null a Chanada ann a 1982 agus a chaidh a chraoladh ann a 1983.

Dh'fhàg teaghlach Ciorstaidh Nic-a-phì Gramasadal am Beinn a' Bhadhla airson beatha ùr an Canada ann a 1884 agus rugadh Ciorstaidh ann a Redjacket, Sakatchewan còig bliadhna às dèidh sin. Nuair a chlàr Fred i ann a Moosomin, Saskatchewan bha i 95, ged nach aidicheadh i ach ri 90, agus rinn i dealbh gu math soilleir air mar a thachair riutha mar theaghlach. Chailleadh a pàrantan triùir chloinne agus bha am prairie lom le teantaichean fuar sa gheamhradh ach shoirbhich leotha mu dheireadh. Show less