Chomharraich deireadh a' Chèitein 2017 gu robh ceithir fichead bliadhna bho ghluais an teaghlach aig Dòmhnall Dòmhnallach gu baile Horgaboist, baile a bha air ùr shuidheachadh. B' ann às na Bàigh air taobh an ear na Hearadh a ghluais an teaghlach aig Dòmhnall chun a' mhachaire air an taobh an iar.
Sa phrògram sa, tha Ceitidh Anna NicChoinnich a' coinneachadh ri feadhainn eile coltach rithe fhèin a bha ag èirigh suas sa bhaile bheag seo air a' mhachaire anns nach robh ach ochd fearainn. Cluinnidh sinn, ged nach robh na h-uidhir de dhaoine a' còmhnaidh ann, gum b' e baile air leth trang a bh' ann fad na bliadhna. Air feadh an t-samhraidh bhiodh luchd-turais a' tighinn a champachadh chun na tràghad, gu leòr dhuibh a' tilleadh a h-uile bliadhna agus càirdeas leantainneach air a dhèanamh ri muinntir a' bhaile.
Ach cha robh e gu diofar dè an t-àm dhan bhliadhna bhiodh ann, bho mhoch gu dubh, dh'fhaodar a bhith cinnteach gum biodh othail gu leòr timcheall air dachaigh chlann MhicAoidh aig 'Number 5! Eadar a bhith ruith bùth agus stòr agus companaidh làraidhean, cha robh e gu diofar dè an t-àm den latha air an tadhladh muinntir na Hearadh aca, bha aoigheachd a' fèitheamh orra bho Iain Mòr agus Mìmi. Show less