Aig deireadh an t-samhraidh thàinig naidheachd gun robh Taigh-òsta Roghadail ann an ceann-a-deas na Hearadh a' dùnadh a dorsan airson an uair mu dheireadh agus ga cuir air a' mhargaidh, a' ciallachadh deireadh a' cheangail ris an teaghlach MacCallum aig an robh an Taigh-òsta bho 1934. B' e togalach a bha seo a choisinn cliù ann an eachdraidh a' dol air ais gu 1781 nuair chaidh a togail le Alasdair MacLeòid a bhuineadh do Bheàrnaraigh 's aig an robh oighreachd na Hearadh aig an àm.

Anns a' phrògram an-diugh tha Ceitidh Anna NicChoinnich a' faighinn dealbh air an togalach fhèin bho fheadhainn a bha an dà chuid ag obair ann agus a' frithealadh an àite. Tha Flòrag Nic A' Phiocair, Dollag NicIllEathain agus Tina NicLeòid ag innse mun obair eadar-dhealaichte bh' aca ri dhèanamh gach latha. Gheibh sinn dealbh air cò ris an robh e coltach a bhith ag obair air cùl cunntair a' bhàr san taigh-sheinnse còmhla ris na bràithrean Ailean agus Aonghas MacIllEathain agus gheibh sinn sgeulachdan gu leòr mu na caractaran a bhiodh a' tadhal ann.

Cluinnear cuideachd mun chliù a bh' aig Taigh-òsta Roghadail airson an uisge-beatha aig an robh ceangal rìoghail, Royal Household. Tha Iain Murchadh Moireasdan ag innse mun eachdraidh co-cheangailte ris agus tha feadhainn ag innse mar a tha iad fhèin an-diugh a' gabhail aithreachas nach do ghlèidh iad fhèin botal dheth! Show less