Ann an 2016, tha timcheall air 90,000 neach ann an Alba a' fulang le seargadh-inntinn no dementia, agus tha suas ri 3,200 dhuibh sin fo aois 65.

Air an t-seachdain seo, tha buidhnean leithid Alzheimer Scotland agus buidhnean slàinte agus cùram eile airson aire a thoirt gu dementia.

Tha iad an dòchas gun cuidich seo daoine a tha a' fulang, no an teaghlaichean, le bhith a' faighinn dearbhadh cho tràth 's a ghabhas ma thathas a' smaoineachadh gu bheil trioblaid ann. Agus mas e 's gun tèid a' chùis a dhearbhadh, tha iad airson 's gum faigh iad an dà chuid taic agus fiosrachadh ann a bhith a' gabhail ris an naidheachd, agus tuigse air mar a dh'fhaodadh cùisean a bhith san ùine a tha air thoiseach orra.

Anns a' phrògram seo, cluinnidh sinn bho agus mu dhaoine a tha a' fulang air sgàth 's dìth na cuimhne, a' bhuaidh a th' aige seo air na teaghlaichean, comhairle bho dhotair, neach-lagha agus iomradh air cuid de na diofar bhuidhnean a tha a' toirt taic seachad ann an iomadh dòigh. Show less