B' ann do Dhail bho Dheas a bhuineadh Calum Moireasdan, Calum Aonghais Thormoid, a bha anns na trainnsichean ann am Blàr an Somme, blàr cho fuilteach sa bh' anns a' Chiad Chogadh, 's a dh'fhàg mu mhillean saighdear, bho gach taobh, marbh neo air a leòn. 'S ann còmhla ri Rèiseamaid nan Camshronach a chaidh Calum dhan Fhraing agus thàrr e beò bho raon an Somme far am faca e uabhasan bha dìreach eagalach. Thug e cunntas mionaideach dha na thachair dha ann an clàradh a rinn e dha Comann Eachdraidh Nis nuair a bha e ceithir fichead bliadhna sa còig. Anns a' chlàradh tha Calum a' bruidhinn mu fhuil ga dòirteadh agus daoine gan reubadh às a chèile agus gur iomadh uair a bhiodh e a' smaoineachadh dè bu chiall dhan seo agus carson a bha esan ann?

Coltach ri tòrr theaghlaichean eile cha robh mic Chaluim - Aonghas, Ronnie agus Calum a' cluinntinn mòran bhon athair mun chogadh, ma bha càil idir. Anns a' phrògram tha iad ag innse do dh' Angela NicIlleathain na faireachdainn a bh' aca àg èisteachd ris a' chlàradh air leth prìseil seo. Show less