An-diugh tha Gilleasbuig MacDhòmhnaill ag innse mar a chaidh Black Watch Corner a thoirt air oisean de sgìre Zonnebecke sa Bheilg ann am blàr a bha mar phàirt de Chiad Blàr Ypres. Cha robh a' bhuaidh a fhuair saighdearan Bhreatainn gun phrìs ge-tà. Cluinnear mar a chaidh an crùisear Gearmailteach, Emden a sgrios le bàta Astràilianach, HMAS Sydney, agus gheibh sinn earrann à Òran Cogadh a' Khaiser a rinn Gilleasbuig MacDhòmhnaill à Uibhist a Deas.

Chan eil fhios dè a thachair dhan SS Hector air a' cheathramh là deug den t-Samhain 1914 ach nach fhacas a-riamh tuilleadh i. Air an t-seachdain sa cuideachd, ceud bliadhna air ais, chaochail Field Marshal Earl Frederick Roberts san Fhraing, ged nach b'ann ri aghaidh a' bhlàir.
Agus rinn dithis - am maighistir-sgoile a bh'air a bhith aige, Coinneach MacCoinnich, agus duin' eile gun urra - luaidh ann am bàrdachd air Teàrlach Macleòid à Bail' an Truiseil an Leòdhas a chailleadh air a 15mh den t-Samhain nuair a thug 'an luaidhe snuadh a bhàis' air.
Bha oidhirp mhòr dha dhèanamh cuideachd dìon a chuir air goireasan ola sa Chamas Mhòr agus choinnich Feachdan Bhreatainn ri Feachdan Tuirceach aig Saihan, faisg air Basra.

Cluinnidh sinn mu oidhirp a chaidh a dhèanamh cuir às do dh'ionadan sa Ghearmailt far a robhas a' dèanamh na Zeppelins, soithichean-adhair ro robh feagal aig ceannardan feachdan Bhreatainn. Cuideachd, mar a chaidh U-18 a cuir fodha le HMS Garry agus mar a chaidh HMS Bulwark a spreadhadh le call beatha eileanach am measg a' chall uabhasach de suas ri 800 duine a bh' air bòrd. Cha d'fhuair ach dusan duine aiste beò. Show less