Mar a thuirt an t-Ollamh Dòmhnall Meek, chan eil a seo ach sgeulachd aon saighdear, ach tha iomadach sgeulachd eile mu iomadh saighdear a b'urrainnn innse nam biodh am fiosrachadh ri lorg. Tha Dòmhnall an tòir air Iain Dòmhnallach, bràthair a sheanmhar, saighdear à Tiriodh, a chaidh a mharbhadh aig Blàr Arras san Fhraing sa Chiad Chogadh. Tha Dòmhnall fortanach oir bha na litrichean, an leabhar-là, na cairtean-posta, a' bhàrdachd agus na deilbh, a tha a' toirt cnaimh-droma na sgeòil dha, air a thasgadh leis an teaghlach. 'S e buille chruaidh dha-rìribh a bha na bhàs dhan teaghlach - am fear a b' òige, am fear a bha air beatha a dhèanamh dha fhèin an Canada, am fear a fhuair cothrom, dha spìonadh air falbh 's gun e ach deich bliadhna fichead. Tha stòiridh Iain air leantainn ri Dòmhnall fad a bheatha agus a seo tha e ag innse mu bheatha thràth ann an Tiriodh agus an Canada, agus a' dol dhan Fhraing a dh' fhaicinn dha fhèin far na thuit Iain agus far a bheil e an-diugh na shìneadh còmha ri na mìltean eile nach do thill. Show less