Mar a thuirt an t-Ollamh Dòmhnall Meek, chan eil a seo ach sgeulachd aon saighdear, ach tha iomadach sgeulachd eile mu iomadh saighdear a b'urrainnn innse nam biodh am fiosrachadh ri lorg. Tha Dòmhnall an tòir air Iain Dòmhnallach, bràthair a sheanmhar, saighdear à Tiriodh, a chaidh a mharbhadh aig Blàr Arras san Fhraing sa Chiad Chogadh. Tha Dòmhnall fortanach oir bha na litrichean, an leabhar-là, na cairtean-posta, a' bhàrdachd agus na deilbh, a tha a' toirt cnaimh-droma na sgeòil dha, air a thasgadh leis an teaghlach. 'S e buille chruaidh dha-rìribh a bha na bhàs dhan teaghlach - am fear a b' òige, am fear a bha air beatha a dhèanamh dha fhèin an Canada, am fear a fhuair cothrom dha spìonadh air falbh 's gun e ach deich bliadhna fichead.

Sa phrògram mu dheireadh tha Dòmhnall a' ruighinn an làraich far an d' fhuair Iain bàs aig a Railway Triangle ann an Arras agus e a' sabaid còmhla ri feachd nan Earra-Ghaidhealach agus nan Sutharlannach air a 9mh den Ghiblean 1917. Tha e cuideachd a' tadhal air àite air a robh smuaintean Iain aig an taigh ann an Tioriodh goirid mus do bhàsaich e. An sin rinn Dòmhnall bàrdachd, Feamainn Ghrod, a tha làn shamhlaidhean mu fhàileadh grod a' bhàis. Às dèidh a bhith aig uaigh Iain ann an Cladh St Catherine, sgrìobh e Not Forgotten in Caolis, Tiree. Mu dheireadh cluinnidh sinn dà òran a chaidh a dhèanamh do dh'Iain - an cumha a rinn Oighrig NicDhòmhnaill dha agus a' bhàrdachd a rinn Dòmhnall Meek, Iain Againn Fhìn, agus ris na chuir Mairi Anna NicUlaraig ceòl. Show less