Mar a thuirt an t-Ollamh Dòmhnall Meek, chan eil a seo ach sgeulachd aon saighdear, ach tha iomadach sgeulachd eile mu iomadh saighdear a b'urrainnn innse nam biodh am fiosrachadh ri lorg. Tha Dòmhnall an tòir air Iain Dòmhnallach, bràthair a sheanmhar, saighdear à Tiriodh, a chaidh a mharbhadh aig Blàr Arras san Fhraing sa Chiad Chogadh. Tha Dòmhnall fortanach oir bha na litrichean, an leabhar-là, na cairtean-posta, a' bhàrdachd agus na deilbh, a tha a' toirt cnaimh-droma na sgeòil dha, air a thasgadh leis an teaghlach. 'S e buille chruaidh dha-rìribh a bha na bhàs dhan teaghlach - am fear a b' òige, am fear a bha air beatha a dhèanamh dha fhèin an Canada, am fear a fhuair cothrom dha spìonadh air falbh 's gun e ach deich bliadhna fichead. Anns an dàrna prògram tha Dòmhnall aig Arras san Fhraing a' dol chun na dearbh àitichean anns am biodh Iain a' sabaid ann a leithid Beaumont Hamel aig a' Somme.

Tha sinn cuideachd a' faighinn dealbh air beatha làitheil an t-saighdeir eadar ullachadh airson a dhol a shabaid, acras is eile tro na litrichean a bhiodh Iain a' cur dhachaigh.

Tha Dòmhnall fhèin air a ghluasad gu bàrdachd chumachdach a sgrìobhadh aig Beaumont Hamel. Show less