Tha an Comunn Gàidhealach a' comharrachadh 120 bliadhna den bhuidheann am bliadhna. Anns an t-sreath-sa à tasglann a' BhBC, a chaidh a chraoladh ann a 1991 agus An Comunn a' comharrachadh 100 bliadhna, tha Mairead Nic a' Phì a' coimhead ri eachdraidh na buidhne.
Anns an treas prògram san t-sreath tha Mairead a' coimhead ri na bliadhnaichean eadar 1929 agus 1936. 'S ann anns na bliadhnaichean sin a thòisich Càmpaichean Comunn na h-Òigridh agus tha Calum agus Seonag Nicleòid a' cuimhneachadh air nuair a bha iad fhèin dham frithealadh. Bha ùidh aig a' Chomunn Gàidhealach anns na gnìomhachasan beaga a bha dol sna h-eileanan agus tha Seonaidh Moireasdan a' bruidhinn air mar a chuir an Comunn Sìne NicLeòid à Grianaig a Nis a dh'ionnsachadh do mhuinntir na sgìre mar a dhèanadh iad rugaichean. Bha seo airson am brosnachadh gus iad fhèin an dèanamh agus cosnadh a dhèanamh asda. Agus tha Donnchadh 'Major' Moireasdan ag innse mar a fhuair e bursaraidh bhon Chomunn ann a 1932 airson trèineadh fhaighinn ann an ceòl. Am measg na seinneidearan a chluinneas sinn tha Madge NicIlleDhuinn agus Dòmhnall MacIosaig. Show less