Chaochail Peadar Jack MacIlleathain, Peadar Jack Pheadair Chaluim Ghobha, à Cùl Eilean na Nollaige an Ceap Breatann air an 11mh den Fhaoilleach 2013. Thogadh e ann an dachaigh a bha aithnichte mar fhìor thaigh-cèilidh agus b' e seinneadair cliùiteach a bh' ann fhèin. B' e saor a bh' ann agus chuir e seachad fichead bliadhna ag obair ann a Boston. Fhads a bha e sin chaidh iarraidh air seinn còmhla ri Seinneadairean a' Chladaich a Tuath aig Fèis Dùthchasach Newport Rhode Island agus aig Fèis Dùthchasach a Smithsonian. Nuair a thill e fhèin agus a' bhean, Mairead, gu Eilean na Nollaige sna seachdadan chaidh e sheinn comhla ri Seinneadairean Gàidhlig Shanndraidh. Bha Peadar aoigheil dha-rìreabh ris an iomadh duine a thadhladh air agus fialaidh ann a bhith a' toirt seachad na h-òrain a bh'aige don ath ghinealach de sheinneadairean. Bha meas mòr aig leithid Màiri Sìne NicLaomainn air, mar a dh'innis i agus i a' cuimhneachadh air aig cuirm aig Celtic Connections an Glaschu ann a 2013, agus tha ionndrainn mhòr air. Duine àrd, eireachdail, ciùin a bha na thlachd a bhith na chuideachd.
Chlàr Annella Nicleòid am prògram seo, as t-samhradh 2010, còmhla ri Seumas Watson agus Peadar Jack, na dhachaigh ann an Cùl Eilean na Nollaige. Show less